Ադել Քամել, «Կահիրեի հանճարեղ խարդախը» վեպ, անգլերենից թարգմանությունը՝ Լիլիթ Քալաշյանի, 288 էջ, «Անտարես», 2022թ.:
Ադել Քամելի «Կահիրեի հանճարեղ խարդախը» ժամանակ եւ սահմաններ չի ճանաչում: Քամելը գրում է 1930-ականների Կահիրեի մասին, որտեղ երիտասարդ հերոսները՝ Խալեդն ու Մալիմը փորձում են իրենց ճանապարհը հարթել աշխարհի քաոսում: Դաժան եւ հարուստ Ահմեդ փաշա Խորշեդի որդի Խալեդը՝ արտասահմանում ուսումն ավարտելով, հոր երազած տղամարդը չի դառնում:
Մալիմը՝ փողոցներում օծանելիք վաճառող խենթի որդին, ուզում է նոր էջ բացել կյանքում եւ արժանապատիվ աշխատանքով ապրուստ վաստակել: Թվում է՝ Խալեդի եւ Մալիմի ճանապարհները երբեք չեն խաչվի, բայց Քամելի Եգիպտոսում մարդը չի կերտում իր ճակատագիրը, եւ պատահականությունների անտես շղթան Խալեդի եւ Մալիմի կյանքը անդառնալիորեն փոխում է:
Քամելը հեգնանքով է խոսում իր կերպարների կայացրած որոշումների մասին, բարձրացնում է կարգավիճակի, կրթության, հայրերի եւ որդիների հակամարտության, հասարակության պարտադրանքների ու նախապաշարմունքների հրատապ հարցեր: Երգիծանքով համեմված ստեղծագործությունը լի է ողբերգականությամբ, վառ կերպարներով եւ նուրբ հումորով: