Վըրջինիա Վուլֆ, «Միսիս Դելոուեյ», վեպ, թարգմանությունն անգլերենից` Վահե Արսենի, 248 էջ, Զանգակ, 2021թ.

«Միսիս Դելոուեյ»–ը Վըրջինիա Վուլֆի՝ գեղագիտական առումով առաջին ամբողջական նորարարական վեպն է, որն ընդգրկում է ընդամենը մեկ օրվա իրադարձություններ եւ, մասնավորապես, բարձր հասարակությանը պատկանող Կլարիսա Դելոուեյի կյանքի մեկ օրը, որտեղ յուրահատուկ` վուլֆյան «գիտակցության հոսքի» միջոցով հետպատերազմյան Անգլիան եւ առհասարակ՝ ժամանակի ամեն ակնթարթը ներկայացվում են հերոսների սուբյեկտիվ ընկալումների միջոցով:

Ընդհանուր առմամբ՝ վեպում նկարագրվում է, թե ինչպես է պատերազմը փոխել բոլորի կյանքը. թե՛ նրանց, ովքեր անմիջականորեն գտնվել են դրա հորձանուտում եւ կյանքի ու մահվան կռիվ տվել, եւ թե՛ նրանց, ում բախտ է վիճակվել նորություններին հետեւել թերթերի միջոցով։

Հատկապես էական են երկու հերոսների գոյաբանական մտորումները. պառլամենտականի ազնվական կինը նախապատրաստում եւ ավարտին է հասցնում իր ամենամյա երեկույթը, իսկ զորացրված հոգեկան հիվանդը ինքնասպան է լինում: Սակայն երկու հերոսները, որոնք երբեւէ չեն հանդիպել ժամանակի եւ տարածության անտեսանելի խաչմերուկում, ձուլվում են իրար, նույնանում, եւ հերոսուհին իր մաշկի վրա զգում ու ապրում է կյանքի նոր չափումը:

«Միսիս Դելոուեյ» վեպն ընդգրկվել է Time ամսագրի՝ 1923 թվականից ի վեր գրված 100 լավագույն անգլալեզու գրքերի ցանկում: